‏خاص‬ بقلم الإعلامية ‫‏مها الأطرش‬| ‫‏هوى الشام‬ تعايد السيدة ‫‏فيروز‬

دمشق-هوى الشام

يامرسال المراسيل … بدنا بهالعيد نقدم عيدية لاذهب لا ورود جورية عيد لملكة العيد والغنية بدنا درج ياسمين يعرش عبواب المنسيين ولايحزن ولابيت ولايتسكر باب… بدنا عيد يمر ويسألنا اذا نيسان دق الباب.
ونرد ونقله كيفك أنت وبعدك على بالي ياقمر الحلوين ويرجع أيلول بورقه الأصفر مع صوتك يا إم عيون وساع والتنورة النيلية يلي مع ديقة المطارح ووجع القلوب ساعتك كل صباحاتنا عخمسين سنة وأكتر.. لاتقولي ماعاد بكير ولا تتركينا وحدنا بعدك الزمان مابيصير إلا لتوعينا.. ملائكتك يلي بكت وضحكت عصوتك الحنون يلي ييجيب رياح الشمال الحزينة ويقعدنا عمقد مختير وننطر مواعيد الأرض ونلاقي حدا ناطرنا عالشباك بعتم الليل وقنديل مطفي ويمر صباح ومسا ويوم ويومين وجمعة وشهر وشهرين وينسم هوا بلادي عمفرق الوادي الي فيه سوا مشينا وحبينا بالصيف وبالشتي لشفنا البحر شو كبير ورجعنا عدروب الهوى المطل ع ضيعتنا وعكرم اللولو محل مافيه “ستي” يلي اشتقتيلا وماعلت صوتا، وعالحور العتيق رح نكتب اسمك مش عرمل الطريق لتظلي تتذكرينا وتتذكري طريق النحل والطير الطاير عطراف الدني يحكي للحبايب شو بنا ..
ياصاحبة العيد لولاكي بعنا الخواتم وعقد اللولو ومارحنا عميس الريم ولا عالمحطة ولاشفنا سهرة الحب ولاصح النوم، وماعرفنا ناس من ورق ولاسمعنا بسيلينا، لولاكي كنا اليوم منسيين لا في قهوة عالمفرق ولا عالبال بحارات الشام مشلوحة .. الشام ايه هي يلي أعلنتي إنها “هواكي الأرق” ويلي انزرعتي مع ياسميناتا وجورياتا وانشلحتي ع طرقاتها شال .. هي الشام شآم المجد يلي قصائدها من تمك طلعت أحلى وبردى لليوم بيمر علينا وبيذكرنا بالوعود عدقة مال الشام دار السلام..
فيروز معك ليلية بيرجع الليل وبيسكن، ومعك نحنا والقمر جيران و بترجع الصيفية وبتشتي الدني وبيوقع التلج وشادي بيرجع ويارا بتكبر وريما بتنام وبفك عبسته عاقد الحاجبين..
فيروز يازهرة البيلسان وحدك بتبقي .. وحدك بيلبقلك شك الألماس .. ومنضل بدنا شي مية سنة لنألف عناوين وشعر وحكي أكتر وأجمل من جبران ونزار وإيليا وبشارة وسعيد ورشيد ورفيق وبدوي وغيرون كتار لنقلك شو يعني الكلمة بصوتك وكيف الجمال بيتشكل لما بتقولي الحرف والآه..
اليوم يافيروز عم يغلا عقلبنا عهد الولدنة وكلنا بدنا نرجع ولاد صغار ورا طياراتك الي مش من ورق ، طيارات من غنا وكلمات وصوت .. بدنا وطنا الصغير وناسنا العشاقين .. بدنا نحب بأمل ونحيا بمحبة ونعيش بسلام .. ادعيلنا وصليلنا بتراتيلك العذبة تتكبر سنابل قمح أراضينا ويرجع الخير لبيادرنا المزروعة بسواعد سمرا .. تيرجع يلي راح مع العسكر ونعمر وتتعمر هالدار المحمية بريف العين ..
فيروز كل الي انقال منك وإلك ياست الكلام يامعشوقة البشر يا حالة مابتكرر ياملكة الصباحات كل عام وأنت بألف خير في عيدك الثمانين ..
اذكرينا..